زوجي يسمع اغاني فراق

  زوجي يسمع اغاني فراق, زوجي يسمع اغاني حزينه, زوجي يسمع اغاني حب, زوجي حزين ومكتئب, زوجي حزين على حبيبته.

يمكن ما تفهموني، يمكن تقولون عني إني وحدة موسوسة، لكن أنا متأكدة إن فيه شيء صاير في حياة زوجي، صحيح ما عندي دليل، لكن كل اللي بقوله لكم الحين يبثبت ذا الشيء،

متزوجين من 7 سنين، وعلاقتنا الزوجية كان من أروع ما يكون، وعندنا بنت وولد، وإذا طلعنا مشاوير أنا وزوجي في نفس السيارة نسمع أغاني فرفوشية، أو أغاني حب غالبا، ومرات نغني أنا وياه الأغنية ونأشر على بعضنا، يعني إذا الأغنية فيها كلمات حلوة للثاني أأشر عليه وهو يأشر علي، كنت أحس إنه من قلبه وأنا أكيد من قلبي ..

من سنة، تقريبا بداية عام 2022 لاحظت إنه إذا طلعت اغنية حب زوجي يستانس لكن ما يأشر علي خلاص، ومرات إذا أنا أشرت عليه يبند الراديو أو يسوي ( سكيب ) إذا الاغنية في ذاكرة السيارة، ونحن أصلا كل أسبوع نطلع مشوار مدة ساعتين لأنا ننزل من المدينة اللي نشتغل فيها إلى المدينة اللي فيه أهلي وأهله ونرجع بعد يومين، فنسمع الأغاني على طول الطريق علشان ما نحس بالملل.

المهم بديت ألاحظ إنه يطوف أغاني الحب إذا أشرت عليه، فسألته عن السبب قال ( عيالنا كبروا ) !!! غريب!!!، مع إن عيالنا يستانسون إذا أشرنا على بعض ومرات يندمجون في الأغنية مثلنا، وغالبا أكون حاطة لكل واحد فيهم سماعة وأي باد يشوف قصة أو برنامج تعليمي أحدد مدته بنفسي وأضبط الأمور لهم عشان ما يملون على طول الطريق... يعني غالبا ما يسمعونا.

المهم مر كم شهر ثم واجهته إنه متغير حتى على الفراش صاير غريب وما يستمتع مثل اول، وضغطت عليه بس ما جاوبني بشيء نافع، قال ضغوط عمل ومن ذا الشكل،

بعد فترة صار موقف، كان زوجي برع البيت، وكان تيلفون يرن بطريقة مجنونه، وزوجي في ذا الوقت متعود يطلع من البيت لكن في ذا اليوم طب عليه أبوه فجأة وخذه عزا جارهم، واستعجله، يعني خذاه بدون حتى ما يغير ثيابه، فنسى زوجي تيلفونه، ولاحظت إن تيلفونه يرن بطريقة مهووسه، فاضطريت أرد عليه...

الاسم كان مسجل ثلاث حروف فقط، لكن اللي كانت على الخط وحده، بنت يعني، سألتني: وين فلان؟ قلت لها مو موجود. سألتني: من أنت؟ قلت لها : زوجته، قالت لي : تكذبين، قلت بلا أنا زوجته، أم عياله أرسل لك عقد الزواج مثلا علشان تصدقين، أنت اللي من؟ طبعا أنا شكيت وتنرفزت من سألتني بهذي الطريقة،

لكن هي بسرعة تداركت الموضوع، وقالت : أنا عميلة عنده، والمفروض اليوم نوقع عقود التنظيم وهو ما جاء، قلت لها مشغول اليوم مع عياله!!! يعني عسب أأكد عليها إنه متزوج، وجريتها شوي في الكلام وحسيت إنها منهارة من صوتها، قلت لها ليش ما صدقتي أني زوجته، قالت لأنه ما يبين عليه إنه متزوج، قلت لها متزوجين من تسع سنين، بعد قصة حب، وعندنا طفلين، ...

سكرت الخط، وصرت أفكر وعقلي يودي ويجيب، زوجي عنده شركة تنظيم معارض، مو له بروحه معاه اثنين من ربعه، المهم حاولت أدور في تيلفونه ما قدرت لأنه حاط رقم سري، رجع زوجي من العزا بسرعة وسأل عن التيلفون،

طبعا أنا متأكدة إنها بتقول له اني رديت، فانا قلت خليني أقول له، وقلت له وحدة اتصلت فيك ورديت عليها ... ارتبك وعصب وقال : اشلون تردين على تيلفوني مو من حقك. قلت لأنها اتصلت 11 مرة، قلت يمكن أنت اللي تتصل من تيلفون ثاني تدور على تيلفونك ،فرديت، لكن قولي من هذي!!!

قال عميلة، قلت وليه ما قلت للعميلة إنك متزوج، قال ليش أقول لها إني متزوج شو علاقتها فيني وبزواجي، يعني أمشي وأحط على جبهتي كلمة متزوج،

قلت له تمام، المهم الحين هي عرفت إنك متزوج، قال كيف عرفت: قلت له سألتني أنت من، قلت لها إني زوجتك أم عيالك، قلت خل تعرف أحسن تعتقد إنك عازب وتحط عينها عليك.

ما أقدر أنسى شكله كيف كان أول ما درا إنها عرفت إنه متزوج، وجهه احمر وكان وده يخنقني من القهر، قلت له شو فيك؟ ليش معصب؟ قال ما فيني شي ومرة ثانية ما لك دخل بتيلفوني لو إنه ينفجر مو بس يرن.

من بعد هالموقف وزوجي يسمع أغاني فراق !!! هل هذي صدفة؟ غالبا هي كانت تعتقد إنه عازب، ويمكن كانت بريئة وتريد تتعرف على شخص وتتزوج منه، وإنسانه عندها مباديء وقيمة ذاتية، لذلك أول ما درت إنه متزوج قطعت علاقتها معه، غالبا هذا اللي صار، لأني لاحظت من صوتها أول ما درت إنه متزوج إنها انحرجت و عزيزة نفس ما رضت على نفسها تكون مع خاين غدار.


طبعا أنا ما فتشت أكثر لكن ثقتي في زوجي انهارت ألف، وما عدت أثق فيه وبديت أرتب أموري إني يمكن أنفصل عنه، لأن براقبه وإذا اكتشفت إنه يخوني بتركه ولو يموت ما أرجع له لو يموت ويموت بعد مرة ما أرجع له.

لأني تزوجته عن حب ، وحب وحب ، ومو معقول الحب يتلاشى من قلبه إلا إذا كان نذل، وأنا ما أتحمل أعيش مع الأنذال، رايكم بنات، شو تشوفون تحليلاتي صحيحة، أو أنها مجرد تخيلات؟!!