أخي يرتدي الشورت الفاضح أمامنا

 السلام عليكم يا بنات

أنا من فترة ودي أفضفض عن موضوع بصراحة نفسيتي متعبة منه، وماني لاقيه له حل، وكل ما حاولت أتكلم مع أمي تقلب الموضوع وتدافع عنه كأنه ملاك منزل من السما.

إحنا بالبيت ٣ بنات، وأنا أكبر وحدة فينا، وعندنا أخ واحد عمره ٢٥ سنة، يعني رجال خلاص مب مراهق ولا بزر. المشكله إنه بالبيت يمشي بكيفه، يعني لابس شورتات قصيرة حيل، وأحيانا بدون بوكسر بعد، ويدخل يطلع من الحمام والباب مفتوح، ولا على باله. واللي يقهرني إن أمي ساكته له، وأي شي يصير تقول "عادي ولد.. ما عليه".

أنا والله يا بنات تعبت من هالمنظر، يعني حتى إحنا بنات بيت، مستحين نمشي بلبسنا أو نطلع من غرفتنا، وهو بكل راحة ما عنده لا حياء ولا احترام.

ولما جيت أقول لأمي ترى عيب، والبيت فيه حريم، والشرع حرم هالسوالف.. قالت لي "لا تكبرين الموضوع، هذا ولد، وأنتوا بنات لازم تتغطون". طيب إحنا أصلا متغطين ومنحرجين بعد، بس لين متى؟ إحنا مب خدامات عنده ولا هو بحلالنا عشان نشوف عورته.

تدرون وش اللي مضايقني أكثر؟ إنه يوم يكون في رجال من الأقارب أو ضيوف فجأة، أمي تقوم تكلمنا وتحاسبنا على لبسنا وتغطيتنا، وتحط علينا قوانين، أما هو فعايش ملك متوج.

أنا صرت والله ما أطلع من غرفتي بسبته، حتى خواتي الصغار يقولون نفس الشي. البيت ما صار فيه أمان ولا راحة، صرنا نحس كأن فيه غريب وسطنا.

ودي تساعدوني يا بنات، وش أسوي؟
هل أكلم أخوي بنفسي؟ ولا أهدده؟ ولا أكلم رجال من العايلة؟ ولا أكلم شيخ؟ ولا وش الحل بهالموضوع؟
أحس البيت صار كله مضغوط بسبته، ومو قادرين نعيش طبيعتنا كحريم، وهو يتمشى ويكشف على راحته.

تكفون عطوني رايكم قبل أنفجر.. لأني بديت أفقد أعصابي.